Կենտրոնի նախաձեռնությամբ մեր զինվորները սկսել են գործել գեղեցիկ հայկական գորգ, որը դարձել է համախմբվածության և ուժի խորհրդանիշ՝ գորգի ստեղծման գաղափարի և աշխատանքների շուրջ միավորելով անվանի մտավորականների, հայ և այլազգի հասարակական գործիչների. Տիգրան Մանսուրյան, Ջիվան Գասպարյան, հայկական ջազի լեգենդ Մալխաս, «Ավորա»-ի մրցանակակիր Թոմ Քաթինա և այլոք իրենց բաժին խորհրդանշական ջանքն են դրել գորգի ստեղծման մեջ։«Տիեզերքը» ամբողջապես պատրաստ կլինի մինչ նոյեմբերի 1-ը, այնուհետև այն «կմեկնի» ԱՄՆ, որտեղ տեղի հայ համայնքը հնարավորություն կունենա աճուրդով գնելու այն նոյեմբերի 3-ին՝ ժամը 17:30-ին, Կալիֆորնիայի The Glendale Hilton հյուրանոցում կայանալիք Գալա ընթրիքի ժամանակ: Գորգի ամբողջ հասույթն ուղղվելու է «Հայրենիքի պաշտպանի վերականգնողական կենտրոնի» սրճարանի և ուսումնական կենտրոնի կառուցմանը։

Իսկ աճուրդից հետո վերականգնողական կենտրոնում, «Մեգերյան կարպետ» ընկերության աջակցությամբ, գործելու է գորգագործության կենտրոն, որտեղ վարպետների օգնությամբ մեր զինվորները հմտանալու են գորգագործության արվեստի մեջ։

Հիշեցնենք, որ «Իմ քայլը» հիմնադրամն արդեն մի քանի ամիս է, ինչ իրականացում է «Աջակցություն հայրենիքի պաշտպանի վերականգնողական կենտրոնին» ծրագիրը։

Զինվորական ծառայության ընթացքում վնասվածք, խեղում կամ հիվանդություն ձեռք բերած անձանց աջակցությունը «Իմ քայլը» հիմնադրամի նպատակներից մեկն է, որը հիմնադրամն իրականացնում է «Աջակցություն Հայրենիքի պաշտպանի վերականգնողական կենտրոնին» ծրագրի շրջանակներում։ Ծրագիրը, առողջության վերականգնումից զատ, կարևորում է զինհաշմանդամների և վիրավոր զինվորների սոցիալական ինտեգրումը՝ կրթության և հմտությունների ուսուցման միջոցով։ Ծրագրի իրականացման համար «Իմ քայլը» հիմնադրամի կողմից «Հայրենիքի պաշտպանի վերականգնողական կենտրոնին» հատկացվել է 194,800,000 ՀՀ դրամ։

Հիմնադրամի «Աջակցություն Հայրենիքի պաշտպանի վերականգնողական կենտրոնին» ծրագրի իրականացումը հնարավոր է դարձել ամերիկահայ բարերար, «PMA Venture Capital» խմբի հիմնադիր Ջորջ Բաղումյանի նվիրատվության շնորհիվ։

Նախորդ ամիսների ընթացքում «Իմ քայլի» աջակցությամբ «Հայրենիքի պաշտպանի վերականգնողական կենտրոնը» համալրվել է նոր սարքավորումներով՝ շուրջ 100 վիրավոր զինվորների ընձեռելով վերականգնողական բուժման հնարավորություն։ Աջակցության շնորհիվ կենտրոնի բժշկական թիմի բոլոր անդամներն անցել են վերապատրաստում:

«Աջակցություն հայրենիքի պաշտպանի վերականգնողական կենտրոնին» ծրագրին ծանոթացեք հիմնադրամի կայքում ։

https://mystep.foundation/hy/our-work/237/