ԻՐԱՎԻՃԱԿ
Հայաստանում առկա 590 մշակույթի տներից ներկայումս գործում է 331-ը։ «Իմ քայլը» հիմնադրամը Տարածքային կառավարման և ենթակառուցվածքների նախարարության հետ համատեղ ՀՀ մարզերում գործող մշակույթի տների շրջանում իրականացրել է հարցում, որին մասնակցել է 226 հաստատություն (գործող մշակույթի տների շուրջ 70%-ը)։ Հետազոտության արդյունքները հետևյալն են՝

ՀԻՄՆԱԿԱՆ ԽՆԴԻՐՆԵՐԸ

• Մարզային մշակութային հաստատությունների մեծ մասը ունի վատ շենքային պայմաններ, տեխնիկապես հագեցած չէ, անձնակազմն ունի վերապատրաստման կարիք։

• Երիտասարդների համար մշակութային ժամանցի և ինքնարտահայտման, ստեղծագործելու հնարավորությունները սակավ են։

• Առկա է շարունակական արտագաղթ Երևան կամ արտերկիր։

ՀԻՄՆԱԿԱՆ ԳՈՐԾՈՂՈՒԹՅՈՒՆՆԵՐԸ

Շահառու մշակույթի տների ընտրությունը կկատարի ընտրական հանձնաժողովը՝ բաց մրցույթի/հայտարարության միջոցով, նախապես ընտրված չափանիշների հիման վրա։ Ծրագիրը բաղկացած է երկու բաղադրիչից՝ մարդկային կարողությունների զարգացում և տեխնիկական կարողությունների զարգացում։

Մարդկային կարողությունների զարգացում

1. Անձնակազմի վերապատրաստում․ 4 դասընթաց (յուրաքանչյուրը 3 օր տևողությամբ)՝ հետևյալ թեմաներով՝

➢ Համայնքի և տեղական ու միջազգային կամավորների ներգրավում (այդ թվում՝ համայնքի կարիքների գնահատում),

➢ Հանրային միջոցառումների կազմակերպում և հանրային կապեր և հաղորդակցություն

➢ Տարածքի արդյունավետ կառավարում (ճարտարապետություն, դիզայն)

➢ Ֆոնդհայթայթում (պետական ֆինանսավորում, գրանտային ծրագրեր, սոցիալական ձեռնարկատիրական գործունեություն)։

2. 13 ուսուցողական այց․

Դասընթացների ընթացքում կկազմակերպվեն այցեր հաջողակ մշակութային/կրթական հաստատություններ՝ վերջիններիս փորձը ուսումնասիրելու, ինչպես նաև աշխատանքային կապեր ստեղծելու համար։

3. Մենթորություն․

Դասընթացի ավարտից հետո ծրագրի կողմից ընտրված մասնագետները 8 ամիս կաշխատեն շահառու հաստատությունների հետ՝ օգնելով նրանց․

• կազմել և իրականացնել մեկ տարվա միջոցառումների ծրագիր,

• մշակել և իրականացնել հաղորդակցության ռազմավարություն,

• մշակել հաստատության զարգացման ծրագիր՝ ներառյալ ֆինանսական միջոցների ավելացման գործողություններ։

4. Գործընկերային ցանցի ստեղծում

Ծրագրի մասնակից հաստատությունների և այլ մարզային, երևանյան և սփյուռքի մշակութային հաստատությունների ներկայացուցիչների ներգրավմամբ կստեղծվի գործընկերային ցանց։ Կկազմակերպվեն շարունակական հանդիպումներ և տվյալների փոխանակում, ինչը մասնակիցներին հնարավորություն կտա իրականացնել համատեղ ծրագրեր և փորձի փոխանակում։

Տեխնիկական կարողությունների զարգացում

Ծրագրի երկրորդ բաղադրիչով շահառու հաստատություններից մի քանիսում կիրանացվեն վերանորոգման աշխատանքներ՝ ըստ անհրաժեշտության և առկա ֆինանսական միջոցներից։ Շահառու հաստատությունները նաև կստանան որոշակի քանակությամբ տեխնիկա՝ մշակութային միջոցառումները (ֆիլմերի ցուցադրություններ, համերգներ, ցուցահանդեսներ և այլն) և դասընթացներն ավելի արդյունավետ կազմակերպելու համար։

Շահառու հաստատություններում կստեղծվեն նաև երիտասարդների համար նախատեսված կահավորված սենյակներ՝ «երիտասարդական հանգույցներ»։

ԾՐԱԳՐԻ ԱՐԴՅՈՒՆՔՆԵՐԸ

Կարճաժամկետ արդյունքները

• Վերապատրաստված անձնակազմ
• Վերանորոգված մշակույթի տներ
• Մեկ տարվա միջոցառումների ծրագիր յուրաքանչյուր հաստատության համար
• Ֆոնդերի հայթայթման և հաղորդակցության ռազմավարություն յուրաքանչյուր հաստատության համար
• Ձևավորված գործընկերային ցանց

Երկարաժամկետ արդյունքները

• Մարզային բնակավայրերի մշակութային կյանքի զարգացում և աշխուժացում։
  
• Երիտասարդների համար մարզերում ստեղծագործելու և կայանալու, սեփական համայնքը զարգացնելու հնարավորությունների ստեղծում։
  
• Մշակութային ծառայությունների համաչափության, մատչելիության և հասանելիության ապահովում ՀՀ մարզերում։
  
• Մարզերում զբոսաշրջության և տնտեսության զարգացում՝ վերազինված մշակութային հաստատությունների ակտիվ աշխատանքի շնորհիվ։
  
• Մարզերից բնակչության և հատկապես երիտասարդության արտագաղթի նվազում։
• Համընդհանուր մշակութային կյանքի հարստացում և զարգացում։

ԾՐԱԳՐԻ ԱՐԴՅՈՒՆՔՆԵՐԻ ՇԱՐՈՒՆԱԿԱԿԱՆՈՒԹՅՈՒՆԸ

Ծրագրի արդյունքների շարունակականության երաշխիքն այն է, որ ծրագրի շահառուները պետությունից ֆինանսավորվող հաստատություններ են, հետևաբար նրանց հետագա գործունության համար անհրաժեշտ պահպանման ծախսերը ապահովված են։ Ավելին, վերապատրաստման և մենթորության շնորհիվ հաստատությունները կկարողանան ստեղծել եկամտի նոր աղբյուրներ, ստեղծված գործընկերային ցանցը նոր համատեղ ծրագրերի հնարավորություն կտա։ Միաժամանակ մշակույթի կենտրոնների հետ կստորագրվեն համաձայնագրեր՝ բարեկարգված հաստատությունների պատշաճ պահպանումը և շահագործումը ապահովելու համար։