Ութ տասնյակից ավելի հյուրերին, որոնց թվում էին ՀՀ-ում գործող դեսպանությունների, միջազգային կազմակերպությունների ներկայացուցիչներ, մտավորականներ, բժիշկներ, գործարարներ, ներկայացվեց հիմնադրամի ստեղծման նախապատմությունը, առաքելությունը, հետագա քայլերը:

Շնորհակալություն հայտնելով հյուրերին ներկայության և մինչ այս արդեն իսկ ցուցաբերած աջակցության համար՝ Աննա Հակոբյանը նշեց, որ հիմնադրամի ստեղծման միտքն առաջացել է վերջին երկու ամսվա ընթացքում վարչապետի տիկնոջ կարգավիճակում տարբեր մարդկանց հետ իր շփումների արդյունքում: «Ես հասկացա, որ մի կողմում կան մարդիկ, որոնք հրաշալի գործ են անում և այդ գործը շարունակելու համար ֆինանսների կարիք ունեն, մյուս կողմում՝ մարդիկ, որոնք առաջարկում էին ֆինանսավորել հրաշալի գործեր»,- նշեց Հակոբյանը:

Անդրադառնալով հիմնադրամի առաքելությանը՝ Աննա Հակոբյանն ասաց, որ հիմնադրամը դառնալու է հարթակ բոլոր այն կարևոր խնդիրների լուծման համար, որոնց լիարժեք լուծումն ինչ-ինչ պատճառներով դեռևս հասանելի չէ պետությանն ու կառավարությանը: «Մենք ձգտելու ենք համատեղ ջանքերով կառուցել բոլոր առումներով առողջ և ներառական հասարակություն, որտեղ ոչ ոք անտեսված չի լինի, և բոլորը կունենան հավասար հնարավորություններ»,- նշեց տիկին Հակոբյանը:

Նախատեսվում է, որ հիմնադրամը գործելու է երեք հիմնական ձևաչափով: Այն կամուրջ է լինելու օգտակար գաղափարներ ունեցողների և այդ գաղափարները ֆինանսավորել ցանկացողների միջև, այն հովանավորելու է արդեն իսկ գոյություն ունեցող կամ առաջարկվող  նախագծեր, որոնք կհամապատասխանեն ընդունված և հայտարարված չափանիշներին, և վերջապես՝ իրականացնելու է հենց իր կողմից մշակված մի քանի նախագծեր:

Աննա Հակոբյանը հայտարարեց, որ թափանցիկությունը, հաշվետվողականությունն ու բոլորի առջև բաց լինելը հիմնադրամի գործունեության առանցքային սկզբունքներն են լինելու: Այս սկզբունքների կենսագործման երաշխիքներից է լինելու «բլոքչեյն» տեխնիկական համակարգը, որի շնորհիվ միջոցների հավաքագրումն ու ծրագրերի ֆինանսավորումն իրականացվելու է 100 տոկոս թափանցիկությամբ: Համակարգն այժմ մշակման փուլում է և կսկսի գործել մոտ ապագայում:

«Խոստանում եմ, որ վարչապետի տիկնոջ կարգավիճակում իմ բոլոր քայլերը կլինեն բաց և բոլորի համար տեսանելի, և ես ամեն ինչ կանեմ կոնկրետ ու շոշափելի արդյունքներ գրանցելու համար՝ Հանուն Հայաստանի և Արցախի հանրապետությունների, դրանց քաղաքացիների, Սփյուռքի մեր հայրենակիցների և ամենաբարի ու վեհ գաղափարների»,- ելույթը եզրափակեց Աննա Հակոբյանը:

«Իմ քայլը» հիմնադրամն ստեղծվել է այս տարվա հունիսին: Առաջիկայում հոգաբարձուների խորհրդի ձևավորումից և գործադիր տնօրենի ընտրությունից հետո հիմնադրամը կսկսի ծրագրերի մշակման և մեխանիզմների հստակեցման գործընթաց, որի եզրափակումից հետո կմեկնարկի բուն գործունեությունը: