Այդ ուսանողների մեծ մասն այս տարվա մայիսին գործունեությունը դադարեցրած «Լույս» հիմնադրամի շահառուներ են: «Լույսի» ծրագրերի կասեցումից հետո հայտնվելով անորոշ վիճակում, նրանցից 11-ը շուրջ երկու շաբաթ առաջ նամակ էին հղել «Իմ քայլը» հիմնադրամին՝ խնդրելով աջակցել ուսման վարձի հայթայթման հարցում:

Աջակցություն ստացած բոլոր ուսանողների հետ կնքվում են խորհրդանշական պայմանագրեր

«Չէինք սպասում, որ առնչություն կունենանք այդ խնդրին, բայց նաև դա այնպիսի խնդիր էր, որ չէինք կարող անտեսել, և «Իմ քայլը» հիմնադրամն աշխատեց ամեն ինչ անել, որ այս ընթացքում ինչ-որ չափով լուծում տա այդ խնդրին: Բայց քանի որ հիմնադրամը դեռ ձևավորման փուլում է, մենք դիմեցինք մեր հայտարարած գործունեության մյուս տեսակին, այսինքն՝ փորձեցինք կամուրջ դառնալ, երաշխավորել դիմորդներին»,- լրագրողներին ասաց Աննա Հակոբյանը:

Արդյունքում, հաշված օրերի ընթացքում հիմնադրամի աշխատակիցներն ուսումնասիրել են դիմորդների հայտերը, «Լույս» հիմնադրամի աշխատակիցների միջոցով կապ հաստատել «Լույսի» շահառու այլ դիմորդների հետ նույնպես, պարզել նրանց կարգավիճակը և գտել գործընկերներ, որոնց մասնակցության շնորհիվ «Լույս» հիմնադրամի շահառուներից 18-ը ապահովվել են մասնակի կրթաթոշակով:

Աննա Հակոբյանը հատուկ շնորհակալություն հայտնեց «Վիտալի Գրիգորյանց» հիմնադրամին, որն առաջինն էր արձագանքել «Իմ քայլը» հիմնադրամի դիմումին՝ նվիրաբերելով՝ 222 հազար ԱՄՆ դոլար, Հայկական բարեգործական ընդհանուր միությանը (ՀԲԸՄ), որը մասնակցել է 200 հազար դոլարի չափով, կանադահայ գործարար Վան Լափոյանին, որը 70 հազար դոլարի չափով է նվիրաբերություն կատարել, և ևս մեկ բարերարի, որը չի ցանկացել, որ իր անունը հնչի: Նա շնորհակալություն հայտնեց նաև «Իմ քայլը» հիմնադրամի հոգաբարձուներ Սերժ Թանկյանին և Արսինե Խանջյանին, որոնք մեծ մասնակցություն են ունեցել գործընկերներ գտնելու հարցում:

«Իմ քայլը» հիմնադրամը մի խումբ գործընկերների հետ աջակցել է արտերկրի բուհեր ընդունված 26 երիտասարդների

Այս ընթացքում «Իմ քայլը» հիմնադրամն աջակցել է նաև հիմնադրամին դիմած այլ՝ «Լույսի» շահառու չհանդիսացող 8 երիտասարդների, որոնք, ընդունված լինելով արտերկրի հեղինակավոր բուհեր, ունեին ուսման վարձի խնդիր: Ընդհանուր առմամբ, արտերկրի համալսարաններում ուսումնառության վարձերի փոխհատուցմանն ուղղվել է 570,800 ԱՄՆ դոլար, որից միայն 53,800-ը՝ բուն «Իմ քայլը» հիմնադրամից, մնացյալը՝ գործընկերների միջոցով:

«Բայց ես ուզում եմ խնդրել բոլորին՝ մենք սա արել ենք արտակարգ պայմաններում, սա արտակարգ իրավիճակ էր՝ արտակարգ լուծումներ պահանջող: «Իմ քայլը» հիմնադրամը չի կարող շարունակել այս ճանապարհով լուծում տալ խնդրին: Մենք արդեն սկսել ենք քննարկումներ ինչպես ՀԲԸՄ-ի, այնպես էլ այլ շահագրգիռ կողմերի հետ, որ հասկանանք՝ ինչպես պետք է այս հարցը հիմնավոր և կայուն լուծում ստանա: Որովհետև այն, ինչ տեղի ունեցավ այս 2-3 շաբաթվա ընթացքում, ընդամենը ստեղծված իրավիճակում հնարավորինս արագ և հնարավորինս անցնցում ելք էր»,- ասաց Աննա Հակոբյանը:

Այս տարի «Լույս» հիմնադրամին, նախքան վերջինիս գործունեության դադարեցումը, դիմել էր 48 հայտատու, 24-ը՝ Հայաստանից, 24-ը՝ Սփյուռքից: Սփյուռքահայ դիմորդներին «Իմ քայլը» հիմնադրամը չի կարողացել ձեռք մեկնել: Հայաստանյան դիմորդներից կապ է հաստատվել 20-ի հետ, մնացած 4-ից արձագանք չի ստացվել:

Մարիամ Ղազարյանը և «Իմ քայլը» հիմնադրամի գործադիր տնօրենի ժամանակավոր պաշտոնակատար Վահագն Թևոսյանը ստորագրում են պայմանագիրը

«Մենք ունեինք վերջնաժամկետ՝ համալսարանին հաստատելու՝ գնալո՞ւ ենք էնտեղ սովորելու, թե ոչ, և քանի որ գումարի շատ փոքր մասն էի կարողացել գտնել, մտածում էի, որ մնացածը հնարավոր չի ոչ մի ձևով գտնել: Ես գտել էի մոտավորապես 20 տոկոսը, և 80 տոկոսի չափով «Իմ քայլը» հիմնադրամը օգնություն տրամադրեց, որի համար շատ շնորհակալ եմ»,- ասաց Մարիամ Ղազարյանը, որը Քեմբրիջի համալսարանում մեկ տարվա մագիստրատուրայի ծրագիր է անցնելու միջազգային իրավունքի գծով:

Նարեկ Չոբանյանն էլ, որը Կալիֆորնիայի համալսարանում (Բերկլի) բնապահպանական իրավունք է ուսանելու, ասում է. «Երբ նամակն ստացանք, անսպասելի էր շատ, որովհետև արդեն 4-5 օր էր մնում, որ վերջնական պատասխան տանք, և ամբողջ ընտանիքով շատ ուրախացանք, ու կարելի է ասել՝ ամենաերջանիկ օրերից մեկն էր»: Նարեկը վստահ է, որ իր ընտրած մասնագիտացումը Հայաստանի համար խիստ արդիական է:

Իսկ Էմիլյա Սիմոնյանն ընդունվել է Քեմբրիջի համալսարան և ուսանելու է անասնաբուժություն: Կարծում է, որ վերադառնալուց հետո կզբաղվի գիտությամբ. «Իմ ամենամեծ երազանքներից մեկն այն է, որ այստեղ բացեմ անասնաբուժական կրթություն տվող հաստատություն: Ես շատ մեծ սեր ունեմ կենդանիների նկատմամբ, բայց նաև բնագիտական առարկաների նկատմամբ. անասնաբուժությունն այդ երկուսի խառնուրդ է, այսինքն՝ ինձ համար իդեալական մասնագիտություն է,- ասում է Էմիլյան:

Աջակցություն ստացած բոլոր ուսանողների հետ կնքվում են խորհրդանշական պայմանագրեր, որոնցով շահառուները հանձն են առնում ուսումնառությունն ավարտելուց հետո վերադառնալ Հայաստան և առնվազն 3 տարի աշխատել այստեղ: «Բայց անկախ պայմանագրից, վստահ եմ՝ նրանց կապը հայրենիքի հետ այնքան սերտ է և այնքան ամուր, որ իրենք վերադառնալով՝ այդ ամենը կծառայեցնեն իրենց երկրին և իրենց ժողովրդին»,- Ասաց Աննա Հակոբյանը: