«Արմենեկոոպ»-ում այցելուները լսեցին, թե ինչպես է կազմակերպությունն իրականություն դարձնում իր առաքելությունը՝ մանկահասակ երեխաների խնամքի պատճառով չաշխատող կանանց տրամադրելով կարուձևի անվճար դասընթացներ, և այնուհետև ներգրավելով իր արտադրանքի (կտորե մատիտակալների և տոպրակների) ստեղծման աշխատանքներում, որի հարցում օգնության ձեռք են մեկնում Դիլիջանի դիզայներները։ Ձեռնարկության եկամտի մի մասն ուղղվում է բնապահպանական խնդիրների լուծմանը՝ նպաստելով պլաստիկ տոպրակների փոխարինմանը կտորե տոպրակներով։

«Դիլիջանի երիտասարդների համագործակցության կենտրոն» ՀԿ-ում լճաշենցիները ծանոթացան սոցիալական ձեռնարկատիրության ստեղծման և զարգացման հնարավորություններին, ինչպես նաև երիտասարդների հետ ՀԿ-ի աշխատանքներին՝ ուղղված Դիլիջանում սոցիալական ձեռնարկատիրության և տուրիզմի զարգացմանը, ինչը ՀԿ-ն իրագործում է երիտասարդների կարողությունների զարգացմամբ՝ նրանց տրամադրելով անվճար դասընթացներ և խրախուսելով նրանց ձեռնարկատիրական նպատակները․ «Ունեցեք երազանք։ Եղեք նախաձեռնող», - ասում է ՀԿ-ի նախագահ Արթուր Ղազարյանը։