Դպրոցն արդեն ունի նորոգված 2 մարզադահլիճ՝ նոր մարզագույքով, 2 հանդերձարան՝ կից սանհանգույցներով և ցնցուղարաններով։ Վերանորոգումը նվեր է դպրոցի սովորողներին՝ որպես Հայաստանի հանրային հեռուստաընկերության «Մանկական լիգա» հաղորդաշարի հաղթողներ։ Հանրային հեռուստաընկերության հետ համագործակցության շրջանակներում ԻՄ ՔԱՅԼԸ հիմնադրամը հանձն էր առել պարգևատրել 1-ին և 2-րդ տեղը զբաղեցնող դպրոցների սովորողներին՝ ներառելով դպրոցները «Հանրակրթական դպրոցներում առողջ ապրելակերպի խթանում» պիլոտային ծրագրում՝ նպաստելու դպրոցների մարզական կյանքի ակտիվացմանը և խրախուսելու երեխաների ակտիվ մասնակցությունն ու ներդրումը դպրոցի բարեկարգման գործում:

Միջոցառման ընթացքում «Ինստիգեյթ Մոբայլ» ընկերության Գորիսի մասնաճյուղի աշխատակիցները սովորողների համար ներկայացրեցին սպորտի կարևորության թեման։ Այնուհետև նորոգված մարզադահլիճներից մեկում տեղի ունեցավ բասկետբոլի ընկերական խաղ դպրոցի սովորողների և «Ինստիգեյթ Մոբայլ»-ի աշխատակիցների միջեւ։

Սա արդեն 4-րդ մարզային դպրոցն է, որի մարզադահլիճները նորոգվել են ԻՄ ՔԱՅԼԸ հիմնադրամի կողմից:

Մեր խորին շնորհակալությունն ենք հայտնում «Մանուկյան Սիմոն հիմնադրամին» վերանորոգումը ֆինանսավորելու համար:

***

«Հանրակրթական դպրոցներում առողջ ապրելակերպի խթանում» ծրագիրն առաջիկայում զարգացնելու է ձեռքբերումները՝ նորոգված պիլոտային դպրոցների համայնքներում աշխատելով առողջ ապրելակերպի խթանման ուղղությամբ։ Ծրագրում նոր դպրոցների ներառում առայժմ չի նախատեսվում: