Մխիթար Հայրապետյան (ծնված՝ մայիսի 15, 1990, Երևան, Հայկական ԽՍՀ, ԽՍՀՄ), արևելագետ, քաղաքական, հասարակական գործիչ, «Իմ քայլը» բարեգործական հիմնադրամի գործադիր տնօրեն, «Քաղաքացիական պայմանագիր» կուսակցության հիմնադիր անդամ, կուսակցության ղեկավար մարմնի՝ վարչության անդամ, «Ժողովրդավարական Հայաստան երիտասարդական կուսակցության» համահիմնադիր, Հայաստանի Ազգային ժողովի 7-րդ գումարման պատգամավոր «Իմ քայլը» դաշինքից, Հայաստանի Սփյուռքի նախկին նախարար,Երևանի շախմատի ֆեդերացիայի նախագահ։

Կրթություն

2007 թվականին ավարտել է Երևանի N127 դպրոցը և ընդունվել Երևանի պետական համալսարանի արևելագիտության ֆակուլտետի թյուրքագիտության բաժինը։

2013 թվականին ավարտել է նույն ֆակուլտետի մագիստրատուրան։

2012-2013 թվականներին եղել է ԵՊՀ արևելագիտության ֆակուլտետի Ուսանողական Գիտական Ընկերության և Ուսանողական խորհրդի անդամ։ Գիտական հոդվածի հեղինակ է։

Աշխատանքային գործունեություն

2010-2017 թվականին հասարակական-քաղաքական գործունեությանը զուգահեռ աշխատել է մի քանի տեղական թերթերում` որպես Մերձավոր Արևելքի և, մասնավորապես, Թուրքիայի հարցերով փորձագետ։

2011թ. հիմնադրել է «Երիտասարդ քաղաքական գործիչների ասոցացիա» կազմակերպությունը և մինչև 2015թ. ապրիլին իրականացրել կազմակերպության փոխնախագահի լիազորությունները:

2016 թվականի հունվարից հանդիսանում է «Քաղաքացիական կրթության և երիտասարդության զարգացման կենտրոնի» հիմնադիր նախագահը։

Կուսակցական գործունեություն

Քաղաքացիական պայմանագիր կուսակցություն

«Քաղաքացիական պայմանագիր» կուսակցության հիմնադիր անդամներից է։

2016 թվականի դեկտեմբերին ընտրվել է ՔՊ Նոր Նորքի տարածքային կազմակերպության նախագահ` միաժամանակ ընդգրկվելով կուսակցության քաղաքական խորհրդում։

2016-2018 թվականներին եղել է ՔՊ Սփյուռքի հարցերով համակարգող։

2019 թվականի հունիսի 16-ին տեղի ունեցած «Քաղաքացիական պայմանագիր» կուսակցության 5-րդ համագումարի ժամանակ ընտրվել է ՔՊ վարչության անդամ:

Թավշյա հեղափոխություն

Մխիթար Հայրապետյանը ակտիվ մասնակցություն է ունեցել 2018 թվականին Հայաստանում Նիկոլ Փաշինյանի առաջնորդած իշխանափոխությանը։

Նա Նիկոլ Փաշինյանի հետ 2018 թվականի մարտի 31-ից Գյումրի քաղաքից քայլերթով հասել է Երևան, որտեղ ակտիվորեն մասնակցել հակաիշխանական բողոքի գործողություններին։ Իշխանափոխությունից հետո նորընտիր վարչապետ Նիկոլ Փաշինյանի կողմից նշանակվել է Սփյուռքի նախարար։

2018 թվականին Հայաստանում հակաիշխանական բողոքի գործողությունների մեկնարկը Գյումրիից քայլերթով սկսելու գաղափարը պատկանում է Մխիթար Հայրապետյանին։Մխիթար Հայրապետյանըայդ գաղափարի առաջացման ժամանակ ոգեշնչվել է երկու օրինակով՝ Հնդկաստանում և Թուրքիայում ընդդիմադիր գործիչների բողոքի գործողություններից։

Մխիթար Հայրապետյանը նշել է, որ ինքն օգտվել է 1930 թվականին Հնդկաստանում «Աղի երթի» ընթացքում կիրառված տեխնոլոգիաներից, մասնավորապես, երբ Մահաթմա Գանդին սոցիալական հարցեր բարձրացնելու նպատակով 387 կմ քայլեց։ Նա երթը սկսեց 8 հոգով և ավարտեց 80 հազար հոգով։

Երկրորդ օրինակը Մխիթար Հայրապետյանը վերցրել է Թուրքիայի ընդդիմադիր առաջնորդ Քեմալ Քըլըջդարօղլուի 2017 թվականի քայլերթից, երբ նա քաղբանտարկյալների խնդիրը բարձրացնելու համար Անկարայից քայլեց Ստամբուլ։ Նա իր երթը սկսեց միայնակ և Անկարա մտավ շուրջ 300 հազար կողմնակիցներով:

Սփյուռքի նախարար

2018 թվականի մայիսի 11-ին նշանակել է սփյուռքի նախարար։2018 թվականի մայիսի 30-ին ՀՀ սփյուռքի նախարար Մխիթար Հայրապետյանը վարչապետ Նիկոլ Փաշինյանի գլխավորած կառավարական պատվիրակության կազմում երկօրյա այցով գտնվել է Վրաստանի Հանրապետությունում և մասնակցել պաշտոնական պատվիրակությունների ընդլայնված կազմով բանակցություններին, այցի շրջանակներում եղել է Փոկա, Գանձա, Սաթխա գյուղերում, Նինոծմինդա և Ախալքալաք քաղաքներում և հանդիպումներ է ունեցել տեղի հայկական համայնքի ներկայացուցիչների հետ։

Հուլիսի 24-27-ը ՀՀ սփյուռքի նախարարի գլխավորած պատվիրակությունը եղել է Կիպրոսում։ Պաշտոնական այցի շրջանակում նա հանդիպել է Կիպրոսի Հանրապետության նախագահ Նիկոս Անաստասիադիսի և Կիպրոսի Հանրապետության նախագահի արտերկրյա և հումանիտար հարցերով հանձնակատար Ֆոտիու ֆոտիսի հետ։

Հուլիսի 27-ից օգոստոսի 7-ը Մխիթար Հայրապետյանը աշխատանքային այցով եղել է ԱՄՆ-ում, այցելել Լոս Անջելես, Նյու Յորք և Բոստոն քաղաքներ։ Հանդիպումներ է ունեցել մի շարք քաղաքական գործիչների ու հայկական համայնքի հետ։

Սեպտեմբերի 14-ին Մխիթար Հայրապետյանը վարչապետ Նիկոլ Փաշինյանի գլխավորած պատվիրակության կազմում գտնվել է Ֆրանսիայում:Այցի շրջանակներում վարչապետ Փաշինյանի հետ միասին հանդիպել է ֆրանսահայ համայնքի ներկայացուցիչների հետ։ Նախարարը հանդիպում է ունեցել համայնքի ակտիվ երիտասարդ գործիչների հետ։ Սեպտեմբերի 20-27-ը աշխատանքային այցով եղել է Սիրիայում, Լիբանանում, Եգիպտոսում:

2011 թվականից ի վեր, երբ սկսվեց սիրիական պատերազմը, Մխիթար Հայրապետյանը Հայաստանը ներկայացնող առաջին պաշտոնյան է, ով մեկնել է Հալեպ: Նախարարը աշխատանքային այցով եղել է Լիբանանում: Բեյրութում հանդիպումներ է ունեցել Մեծի Տանն Կիլիկիո Կաթողիկոս Արամ Ա Վեհափառ Հայրապետի և հայկական համայնքի հետ։

Այցելել է Եգիպտոս, որտեղ հանդիպել է Եգիպտոսի վարչապետ Մուստաֆա Մադբուլիի հետ:

Մեկ օրյա այցով եղել է Թեհրանում և հանդիպում է ունեցել բարձրաստիճան նախարարների հետ: ՀՀ ԱԺ Հայաստան-Հունաստան բարեկամության խմբի ղեկավարն է եղել:

2018 թվականին մի շարք սփյուռքագետների հետ խորհրդակցությամբ պատրաստվել է սփյուռքի քաղաքականության ռազմավարության մի փաստաթուղթ, որը սփյուռքի հետ հարաբերություններում հիմնովին նոր մոտեցումներ է առաջարկել:

2018 թվականին սփյուռքի նախարարությունն իրականացրել է մի քանի ծրագիր.

1. «Քայլ դեպի տուն»՝ 24 երկրից 400 մասնակից:

2. «Արի տուն» ծրագրի անցումային փուլեր՝ 16 երկրից 156 մասնակից:

3. Համահայկաական մշակութային փառատոն՝ 11 երկրից 405 մասնակից:

Պատգամավորական գործունեություն

2018 թվականի դեկտեմբերի 9-ին Մխիթար Հայրապետյանը «Իմ քայլը» կուսակցությունների դաշինքից թիվ 1 ընտրատարածքի տարածքային ընտրական ցուցակով ընտրվել է Հայաստանի Ազգային ժողովի պատգամավոր:

Ընտանիք

Մխիթար Հայրապետյանը ունի եղբայր, ով հայտնի է Հայկ Ստվեր ստեղծագործական անվամբ և հանդիսանում է «Քաղաքացու երգը» ստեղծագործության հեղինակը։

Հետաքրքիր փաստեր

Հանդիսանում է ԵՊՀ հոգաբարձուների խորհրդի, Հայաստանում ֆուտբոլի գործկոմի և մի շարք այլ կառույցների հոգաբարձու անդամ:

Աննա Հակոբյանը ՀՀ վարչապետի տիկինն է, լրագրող, հասարակական գործիչ։ 2003-ից մինչև 2008 թ. որպես լրագրող աշխատել է «Հայկական ժամանակ» օրաթերթում։ 2008-ին ամուսնու՝ «Հայկական ժամանակ» օրաթերթի գլխավոր խմբագիր Նիկոլ Փաշինյանի ընդհատակ անցնելուց, այնուհետև՝ ազատազրկումից հետո ստանձնել է օրաթերթի գլխավոր խմբագրի ժամանակավոր պաշտոնակատարի պարտականությունները։ 2013 թվականից դարձել է օրաթերթի գլխավոր խմբագիրը: 2018 թվականի մայիսի 8-ին ՀՀ վարչապետի պաշտոնում Նիկոլ Փաշինյանի ընտրությունից հետո Աննա Հակոբյանը, արդեն որպես երկրի ղեկավարի տիկին, ընդարձակում է իր գործունեության շրջանակը: Մայիսին նա ստանձնում է «Սիթի օֆ սմայլ» («Ժպիտների քաղաք») հիմնադրամի հոգաբարձուների խորհրդի նախագահությունը, հունիսին հիմնադրում է «Իմ քայլը» հիմնադրամը, օգոստոսին մեկնարկում «Կանայք հանուն խաղաղության» արշավը։ Այժմ Հակոբյանը հիմնադրամների ղեկավարումը և խաղաղության արշավի շրջանակներում գործունեությունը համատեղում է «Հայկական ժամանակ» օրաթերթի գլխավոր խմբագրի պարտականությունների հետ։

Աննա Հակոբյանը Երևանի պետական համալսարանի լրագրության ֆակուլտետի շրջանավարտ է, մասնակցել է մի շարք դասընթացների Հայաստանում և արտերկրում։

Արսինե Խանջյանը դերասանուհի է, պրոդյուսեր, հասարակական գործիչ։ Նա քաղաքագիտության և հանրային կառավարման մագիստրոսի կոչում ունի Տորոնտոյի համալսարանից։ Դերասանական կարիերայից զատ, նա քաղաքականության մշակման մեծ փորձ ունի արվեստների և կառավարման ոլորտներում։ Կինոյում և թատրոնում իր դերերի համար Արսինե Խանջյանը միջազգային ճանաչում է ձեռք բերել, արժանացել մի շարք մրցանակների։ Արվեստի, պատմության և մշակութային հարցերում իր ակտիվ ներգրավվածության համար պարգևատրվել է մի շարք մեդալներով Կանադայում և դրա սահմաններից դուրս (Թագուհու ոսկե հոբելյանի մեդալակիր (2002), Սուրբ Մեսրոպ Մաշտոց մրցանակ (2003), Կինո և հեռուստատեսության բնագավառում կանանց ստեղծարար գերազանցության բյուրեղյա մրցանակ (2005), «Հայրենիքին մատուցած ծառայությունների համար» 1-ին աստիճանի մեդալ (2011) և այլն)։ Խանջյանը շարունակում է ակտիվ հանրային գործունեություն ծավալել։ Նա, մասնավորապես, հայագիտական ուսումնասիրությունների և փաստագրման Զորյան ինստիտուտի տնօրենների խորհրդի անդամ է։

Photo credit: Guilio Muratori

Լենա Նազարյանը ՀՀ Ազգային ժողովի պատգամավոր։

2005-2009 թթ. աշխատել է «Հետք» շաբաթաթերթի լրագրող: 2009-2015 թթ.՝ «Թրանսփարենսի Ինթերնեշնլ հակակոռուպցիոն կենտրոն» ՀԿ-ի ընտրական ծրագրերի համակարգող: 2015-2016 թթ. եղել է Հայաստանի ամերիկյան համալսարանի Պատասխանատու հանքարդյունաբերության կենտրոնի շրջակա միջավայրի մոնիտորինգի ծրագրի համակարգող։

2013 թ․ սկսած ակտիվ քաղաքականության ոլորտում է։ 2016 թ. ընտրվել է «Քաղաքացիական պայմանագիր» կուսակցության վարչության անդամ, 2017 թ․՝ ԱԺ պատգամավոր («Ելք» կուսակցությունների դաշինք): 2019 թ. հունվարի 15-ին ընտրվել է Հայաստանի Հանրապետության ԱԺ նախագահի տեղակալ: 2021 թ․ արտահերթ խորհրդարանական ընտրություններում ընտրվել է ԱԺ պատգամավոր («Քաղաքացիական պայմանագիր» կուսակցություն)։

Լենա Նազարյանն ավարտել է ԵՊՀ ժուռնալիստիկայի ֆակուլտետը, միաժամանակ՝ Ժուռնալիստիկայի հայկական դպրոցի մեկամյա դասընթացը: 2014 թ.՝ Ժամանակակից արվեստի ինստիտուտը: Արժանացել է «Խոսքի ազատություն» մրցանակին (2013 թ., «Ասպարեզ» ժուռնալիստների ակումբ): Լենա Նազարյանը «Իմ քայլը» հիմնադրամի համահիմնադիրն է։

Վահագն Թևոսյանը 2021 թ․ մարտից Հանրային հեռարձակողի խորհրդի անդամ է։

Ավարտել է Երևանի պետական համալսարանի բանասիրության ֆակուլտետի հայոց լեզվի և գրականության բաժինը:

1998-2004 թթ. աշխատել է «Օրագիր», այնուհետև «Հայկական ժամանակ» օրաթերթերի լրագրող, ապա՝ խմբագիր: 2004-2007 թթ. եղել է «Հասարակական երկխոսության և զարգացումների կենտրոն» ՀԿ-ի հասարակայնության հետ կապերի մասնագետ, 2008-2010 թթ.՝ «Ռադիո Հայ» ռադիոկայանի լրատվական ծառայության տնօրեն, 2010-2011 թթ.՝ «Հրապարակ» օրաթերթի կայքի խմբագիր: 2011-2017 թթ. որպես հաղորդումների խմբագիր աշխատել է «Արմնյուզ», այնուհետև՝ «Արարատ» հեռուստաընկերությունում: Եղել է «Վայրի բնության և մշակութային արժեքների պահպանման» հիմնադրամի հանրային կապերի համակարգող, ապա 2018 թ. հուլիս-դեկտեմբեր ամիսներին՝ Հայաստանի հանրային հեռուստաընկերության լրատվական և վերլուծական հաղորդումների տնօրեն:

2018-2021 թթ․ եղել է ԱԺ պատգամավոր («Իմ քայլը» խմբակցություն)։

2018 թ․ հունիսին Աննա Հակոբյանի և Լենա Նազարյանի հետ համահիմնադրել է «Իմ քայլը» հիմնադրամը։

Վահան Վարդապետյանը բժիշկ մանկաբարձ-գինեկոլոգ է, բժշկական գիտությունների թեկնածու։ Երևանի բժշկական ինստիտուտն ավարտել է գերազանցության կարմիր դիպլոմով, այնուհետև ավարտել նույն ինստիտուտի օրդինատուրան և ասպիրանտուրան։ Երկու անգամ վերապատրաստում է անցել Ֆրանսիայի Մարսել քաղաքի համալսարանական կլինիկայում: 1994թ.-ից ղեկավարում է Պերինատոլոգիայի, մանկաբարձության և գինեկոլոգիայի հանրապետական ինստիտուտի վերարտադրողական առողջության բաժանմունքը, որտեղ արդյունավետորեն բուժվել են անպտղությամբ տառապող հազարավոր ամուսնական զույգեր: Զբաղվում է ակտիվ հասարակական-քաղաքական, ինչպես նաև մշակութային գործունեությամբ և հրապարակախոսությամբ:

Սառա Անջարգոլյանը Իմփաքթ Հաբ Երևանի համահիմնադիրն ու ղեկավարն է։ Նա նաև իրավաբան է և մուլտիմեդիա լրագրող (http://www.saraanjargolian.com/)։ Ծնվել է Լոնդոնում, մեծացել ու կրթություն ստացել ԱՄՆ-ում (Կալիֆորնիայի համալսարան (Լոս Անջելես)՝ քաղաքագիտություն և հանրային քաղաքականություն, Կալիֆորնիայի համալսարան (Բերկլի)՝ իրավագիտություն)։ Այժմ ապրում և աշխատում է Հայաստանում։ Իմփաքթ Հաբի շրջանակներում Սառայի գործունեությունն ուղղված է փոփոխություն բերողների և նորարարների զորացմանը՝ սոցիալական ազդեցություն ունեցող նրանց նախագծերի հասունացման ու իրագործման միջոցով։

Լուսինե Քասարջյան՝ հանդիսանում է ՍԵՆՍՅԱՆ խորհրդատվական ընկերության գործերի կառավարիչ, որը ծառայություններ է մատուցում Հայաստանում ներդրումներ կատարող, գործող կամ նոր գործունեություն ծավալող ընկերություններին: Նախկինում նա եղել է FestivAr հայկական փառատոնների ասոցիացիայի գործադիր տնօրենը: Կազմակերպությունը համակարգում, խթանում և աջակցում էր ամենամյա փառատոնների կայուն զարգացմանը Հայաստանի քաղաքներում և գյուղերում: 2014 թ.-ից ի վեր Լուսինեն եղել է Էյ Թի Փի բարեգործական հիմնադրամի հայաստանյան գրասենյակի տնօրենը, որը ստեղծվել է ԱՄՆ-ից բարեգործական ֆոնդի հիման վրա: Վերջինս Հայաստանի և Արցախի Հանրապետությունների ողջ տարածքով տնկել է ավելի քան վեց միլիոն ծառ, ինչպես նաև սկսած 2005 թ.-ից յուրաքանչյուր տարի հազարավոր ուսանողների համար կազմակերպում է բնապահպանական դասընթացներ: 2009 թ.-ին ստեղծվել է ՌեԱնիմանիա անիմացիոն ֆիլմերի միջազգային փառատոնը: Լուսինեն եղել է այս փառատոնի համահիմնադիրը, և առաջին չորս տարիների ընթացքում նաև գեղարվեստական ղեկավարը: Նա նաև հանդիսանում է MolorakArts կազմակերպության հիմնադիրը, որը մասնագիտանում է թվային և ավանդական մեդիա-պրոդուկտների վրա, տարբեր տարիքային խմբի երեխաների համար: Նա «Ուրիշ մեկի ամպը» մանկական գրքի հեղինակն է, որը ողղված է լուծելու մանկական վախերի խնդիրը ուրախ և գրավիչ ուղղիներով, որը հագեցած է լրացված իրականության տարրերով: Նա ստեղծել է նաև այլ բազմալեզու մրցանակակիր պրոդուկտներ:

Լուսինեն աշխատել է տարբեր՝ կրթական, բարեգործական և զարգացման ոչ առևտրային կազմակերպությունների խորհուրդներում: Այդ թվում՝ Awesome հիմնադրամի երևանյան մասնաճյուղում, ԻՄ ՔԱՅԼԸ հիմնադրամում, Հայաստանի աջակցության հիմնադրամում, ՀՎՀ՝ Հայկական վիրտուալ համալսարանում, GOALS – Girls of Armenia Leadership Soccer-ում, Հայ կրթական հիմնարկությունում, Bay Area Friends of Armenia-ում, Friends of Yerevan Opera-ում և այլն:

Լուսինեն ստացել է բարձրագույն կրթություն Երևանի Վալերի Բրյուսովի անվան պետական համալսարանում, լեզվաբանության և մանկավարժության ոլորտում, ինչպես նաև սովորել է Սան Ֆրանցիսկոյի արվեստի ակադեմիայի համակարգչային արվեստի և նոր մեդիա բաժնում: Լուսինեն ամուսնացած է Րաֆֆի Քասարջյանի հետ, և նրանք 2008-ին Սան Ֆրանցիսկոյից վերադարձել են Երևան, իրենց երկու երեխաների ՝ Հայկի և Սաթինեի հետ: