Այս նպատակով սեպտեմբերի 16-17-ին «Իմ քայլը» հիմնադրամն իր գործընկեր «Վորլդ Վիժն Հայաստանի» հետ այցելել էր Արցախի հանրապետություն։ Հիմնադրամի գործադիր տնօրեն Հովհաննես Ղազարյանը և «Վորլդ Վիժն Հայաստանի» տնօրեն Ժիրայր Էդիլյանը հանդիպել են Արցախի Հանրապետության նախագահ Բակո Սահակյանի հետ և քննարկել «Աղքատության փուլային հաղթահարման» մոտեցմամբ իրականացվող համատեղ սոցիալական ծրագիրն Արցախում ևս մեկնարկելու հնարավորությունները։

«Աղքատության փուլային հաղթահարման» մոտեցումը Հայաստանում առաջին անգամ կիրառել է «Վորլդ Վիժն Հայաստանը» 2017 թ.-ին։ 2019 թ. հունվարին «Իմ քայլը» հիմնադրամի և «Վորլդ Վիժն Հայաստանը» միմյանց հետ կնքել են համաձայնության հուշագիր, որի շրջանակներում համատեղ աշխատանքներ են իրականացվել 18 աղքատ ընտանիքների հետ։ Արդյունքը ավելի քան ոգևորիչ է ստացվել. այսօր արդեն բարելավված է այդ ընտանիքների մեծ մասի սոցիալ-տնտեսական վիճակը և ընտանիքներն ապրում են առավել ինքնաբավ և սեփական ուժերի հանդեպ վերագտած վստահությամբ։

Արցախյան այցի ընթացքում՝ ծրագիրը բազմակողմանիորեն քննարկելու և այն ներկայացնելու, ինչպես նաև կայուն գործընկերություն և համագործակցություն հաստատելու նպատակով «Իմ քայլը» հիմնադրամն ու «Վորլդ Վիժն Հայաստանը» հանդիպումներ են ունեցել նաև Արցախի Մարդու իրավունքների պաշտպան Արտակ Բեգլարյանի, Արցախի Աշխատանքի, սոցիալական հարցերի և վերաբնակեցման նախարար Սամվել Ավանեսյանի, ինչպես նաև Գյուղատնտեսության նախարար Ժիրայր Միրզոյանի հետ։ Կողմերը քննարկել են ծրագրի ռազմավարությունը, հնարավոր արդյունքներն ու անհրաժեշտ ռեսուրսները ։Հանդիպումներին ներկա են եղել նաև «Իմ քայլը» հիմնադրամի սոցիալական ծրագրերի համակարգող Գայանե Ղազարյանը, «Վորլդ Վիժն Հայաստանի» մարզային զարգացման ծրագրերի ղեկավար Մարինա Հովհաննիսյանը և երեխաների պաշտպանության և կրթական ծրագրերի ղեկավար Աիդա Մուրադյանը։

Խոսելով առաջիկա անելիքների մասին՝ Հովհաննես Ղազարյանն ու Ժիրայր Էդիլյանը տեղեկացրել են, որ համագործակցության առաջին փուլում նախատեսում են «Աղքատության փուլային հաղթահարման» ծրագրի իրագործումը սկսել Արցախի շուրջ 20 ընտանիքների հետ, որի շրջանակներում շահառու ընտանիքներին կտարամդրվի աջակցություն՝  կարողությունների զարգացման, եկամուտների կայուն ավելացման ու արդյունավետ կառավարման նպատակով:

Աշխատանքային հանդիպման ավարտին ԱՀ Մարդու իրավուքների պաշտպան Արտակ Բեգլարյանը, անդրադառնալով Արցախում «Աղքատության փուլային հաղթահարման» ծրագրի մեկնարկին, իր ֆեյսբուքի էջում գրել է՝

«Այսօր ուրախությամբ ընդունեցի «Իմ քայլը» և «Վորլդ Վիժն Հայաստան» հիմնադրամների պատվիրակություններին՝ Հովհաննես Ղազարյանի և Ժիրայր Էդիլյանի գլխավորությամբ: «Իմ քայլը» հիմնադրամի աջակցությամբ «Վորլդ Վիժնը» վերջապես մտնում է Արցախ՝ այստեղ գործունեություն ծավալելու՝ հատկապես երեխաների պաշտպանության ոլորտում կուտակած իր հսկայական փորձառությամբ ու կարողություններով: Ես համոզված եմ, որ այս նոր մեթոդաբանությունն ի վիճակի է որակական նոր մակարդակի բարձրացնել պետական սոցիալական քաղաքականության արդյունավետությունը: Գլխավոր սկզբունքն այն է, որ աղքատ ընտանիքներին պետք է ոչ թե նպաստներ տալ, այլ աջակցել ընտանիքավարության կարողություններ զարգացնել ու սեփական եկամուտները ավելացնել: Հույս ունեմ շուտով նոր ծրագրեր իրագործել այս երկու հիմնադրամների հետ համատեղ, որոնք ևս կօգնեն դրական արդյունքներ արձանագրել մարդու իրավունքների պաշտպանության տարբեր ուղղություններում։»

«Իմ քայլը» հիմնադրամն ու «Վորլդ Վիժն Հայաստանը» համոզված են, որ թեև աղքատությունը մեր երկրի լրջագույն մարտահրավերներից է, բայցև հաղթահարելի է, եթե մեկտեղվեն նույն նպատակը հետապնդող կազմակերպությունների ջանքերը, ինչին հնարավոր է հասնել միայն գործընկերության, պետական և ոչ պետական բոլոր շահագրգիռ կողմերի՝ այդ թվում նաև հենց սոցիալապես անապահով ընտանիքների ակտիվ մասնակցությամբ։