Պատմությունն սկսվեց, երբ սփյուռաքահայ գործարար Սարգիս Կազանջյանը պատրաստակամություն հայտնեց երեք էլեկտրոնային դաշնամուր նվիրել «Իմ քայլը» հիմնադրամին։ Նվիրատուի ցանկությամբ Հիմնադրամն իր հայեցողությամբ դաշնամուրները պետք է նվիրաբերեր գործիքի կարիքն ունեցող համապատասխան կազմակերպությունների։

Քննարկումների արդյունքում որոշվեց, որ դաշնամուրները կուղևորվեն Իջևանի թիվ 8 մանկապարտեզ, Արմավիրի թիվ 10 հիմնական ներառական դպրոց և Արմավիր համայնքի մանկապարտեզ։ Որոշումները կայացնելիս հաշվի են առնվել գործընկեր կազմակերպությունների երաշխավորությունները և նրանց արդյունավետ համագործակցությունն այդ հաստատությունների հետ, ինչպես նաև հիմնադրամի պատասխանատու աշխատակիցների ուսումնասիրություններն ու դիտարկումները։ Որպես դաշնամուրների նվիրառու ընտրվել են հատկապես մարզային հաստատություններ, քանի որ մարզերի երեխաների համար հավասար հնարավորություններ և զարգացնող միջավայր ստեղծելը Հիմնադրամի համար հատուկ կարևորության հարց է։

Արժանահիշատակ է նաև, որ նվիրատուն անձամբ է տեղ հասցրել երաժշտական գործիքները, անձամբ կարգաբերել դրանք և ականատես եղել, թե ինչ մեծ ոգևորությամբ են ընդունվել նվերները։ Շնորհակալ ենք այս սրտաբուխ և բովանդակալից նվիրատվության համար։