Ինստալացիան ներառում էր արվեստագետի գլուխգործոց «Նռան գույնը» ֆիլմի հիմնական մոնտաժից դուրս մնացած կադրերի ցուցադրությունն էկրանների վրա՝ Փարաջանովի արվեստին հաղորդակցվելու բացառիկ հնարավորություն ընձեռելով ոչ միայն հայաստանցիներին, այլև այս օրերին «Ոսկե ծիրան» կինոփառատոնի առիթով Հայաստանում գտնվող արտերկրացիներին։

Հայկական կինոժառանգության վերականգնման ու հանրահռչակման ծրագիրը մեկնարկել է 2018 թվականին Հայաստանի ազգային կինոկենտրոնի ևանգլիացի պրոդյուսեր Դենիել Բըրդի համագործակցությամբ։ Ծրագիրը նախաձեռնել է նաև «Նռան գույնից» դուրս մնացած կադրերի վերականգնումը թվայնացման միջոցով. արժեքավոր կինոժապավենները տեղափոխվել են Լեհաստան, որտեղ էլ FIXAFILM ընկերությունը վերականգնել է դրանք։ «Փարաջանովի գլուխգործոցից դուրս մնացած կադրերը նույնքան արժեքավոր են, որքան Մատենադարանում այսօր պահվող ձեր մագաղաթյա մատյանները»,- երևանյան ցուցադրությանը նվիրված մամուլի ասուլիսում ասել է պրոդյուսեր ինստալացիայի հեղինակ Դենիել Բըրդը։

«Կինոյի տաճար» ինստալացիոն ծրագրի պաշտոնական բացումը տեղի է ունեցել այս տարվա հունվարին Ռոտերդամի 48-րդ միջազգային կինոփառատոնի շրջանակում՝ սուրբ Արմենիուս եկեղեցում, որտեղ 24 էկրանների վրա Տիգրան Մանսուրյանի երաժշտության ուղեկցությամբ զուգահեռաբար ցուցադրվել են Փարաջանովի «Սայաթ Նովա» («Նռան գույնը») ֆիլմից դուրս մնացած կադրերը։ Այսօր արդեն ցուցադրության հրավերներ կան տարբեր երկրներից, ինչը վկայում է «Կինոյի տաճար» ծրագրի հանդեպ մեծ հետաքրքրության մասին։Երևանյան ցուցադրությունն ամբողջացնում էր նաև «Այրարատ» կինոթատրոնի կինոսրահում ցուցադրվող՝ Ռուբեն Գևորգյանցի «Աշխարհումս» վավերագրական ֆիլմը, որը ներկայացնում էր Փարաջանովի կյանքի եզակի դրվագներ։

Ինստալացիոն ցուցադրությունը կազմակերպվել էր «Ոսկե ծիրան» 16-րդ միջազգային կինոփառատոնի շրջանակներում։ Ինստալացիայի հեղինակները նախատեսում են ապագայում «Կինոյի տաճարը» ներկայացնել միջազգային հեղինակավոր փառատոնների շրջանակներում։

Ի դեպ, «Կինոյի տաճար» արտահայտությամբ ֆրանսիացի մեծանուն ռեժիսոր Ժան Լյուկ Գոդարը ժամանակին բնորոշել է Փարաջանովի արվեստն ու կինոն։